失落

今日又要返學幫手宣傳O'Camp，
當然又見到佢啦......
重要有時坐佢身邊添，
但......果然，距離很近，但相隔很遠......

結果，全日同佢講咗幾句話，
內容......只係叫我還返我欠佢0既野比佢......

一直都唔願意還，
但我知今次係避無可避，
結果應承咗佢星期一拎比佢......
之後大家又再繼續互不相識地各自工作......

我一直都唔肯願果樣野，
唔係因為果樣野我還唔起，
亦唔係因為我想唔還，
最大原因係，我好怕還咗，
以後我同佢唯一0既聯繫都會無埋......
好怕將來唔會再有機會見到佢......

今日，見到佢左手無名指上面有一隻介指......
順理成章地，又引起我好多幻想，
我不停咁去搵，睇吓有冇一個男仔有同樣0既介指，
結果，係搵唔到......
但卻見到有D男仔同佢好親熱，
到底邊個會係佢男朋友？
依然係果個，還是另有其人？
今日，我真係無辦法專心咁去Sell野，
不斷咁去望住佢，
當佢離開我視線時就會好緊張咁去搵佢，
但又好怕佢知我望住佢......
間中佢坐我身邊時會有電話黎，
我好想知電話入面果個會唔會係男仔，
會唔會係佢男朋友，
可惜，我無處可尋......

阿Ming同阿光都發現我好失落同悶悶不樂，
都有問我做咩唔開心，
講真，我一向都唔會太過令人覺得我情緒有波動，
但今次我真係控制唔到自己......
結果我只係話我唔太舒服，
有點頭痛......

尋晚......
久違了0既夢又再重現，
夢中我又見到阿蕾，
佢同我傾計，當中我見到有個男仔錫佢，
之後我就醒咗，
當中我同佢傾咗好耐，
但傾咩已經記唔起了......
我真係好驚個夢會係真......

返到屋企之後，
就要煮飯比屋企人食，
一路煮就一路諗，
到底我重會唔會有機會煮飯比阿蕾食？
即使係一次，我都會好珍惜，
煮最好0既比佢食......

愛一個人，唔係要令人愛自己，
而只係好單純因為我愛佢，
就好似阿蕾咁，
無錯我係不斷咁愛佢，亦好希望佢可以再比機會我，
但我好清楚係無可能的......

愛一個人係因為我真係愛佢，
而唔係要佢比返相同回報比我......
有回報，只係上天比人0既恩慰，
恩慰，並唔係必然的......

就好似我一樣......