星期六情人

尋晚,同某人傾開計,
結果約咗今朝睇早場12瞞徒......
結果,我又再一次失手了......

代替品......
大家一早講好大家都只係當大家係代替品,
唔會有感情的吧!

之後一路拖咗佢隻手四圍行......
又攬住佢......唉...個腦一路諗住......唉~~~
總之唔係攬住果個吧!

一直同佢行,行到八點幾就同佢坐巴士返屋企,
車上面,佢一直攬住我......
其間,佢問我,係唔係好掛住阿蕾......
我無言以對......
唉......我答係又死,答唔係又死......
結果我都答咗係......
之後我知佢一車上攬住我都喺度喊,
同時,我已經知道,佢對我,戲假成真......

落車之後,佢問我可唔可以陪佢坐公園,
我話無所謂,then就陪佢坐......
之後,佢錫我,我亦有迎合佢......
跟住,佢攬住我喊咗足足九個字......
我一直同佢講,我唔值得的,
我唔係好男人......唔值得任何人為我喊......
佢話我,其實好好,只不過係花心......
哈......呢一條,足為成為死罪了吧!
跟住我亦同佢講,
即使我同佢一齊咗,但只要我覺得我同阿蕾係再有可能,
我會毫不猶疑咁掉低佢而去追阿蕾的......
佢話佢唔介意...但我介意!
我做錯過一次的了,我真係唔想再傷害任何人,
更加唔想傷害一個愛我0既人!
結果我還是拒絕咗佢......

佢一直喊,令我諗返起,
初初同阿蕾一齊時,有一晚佢突然喺佢樓下公園攬住我喊...
叫我唔好呃佢,感情呢樣嘢佢玩唔起......叫我唔好掉低佢......
唉......又再覺得自己好無用......

最後,我用返平時同佢係朋友咁0既聲線同佢講嘢,
叫佢帶路,帶我行一陣,因為我唔熟路......
之後我知佢都有喊的,
不過......我還是殘忍一點吧!
最後送到佢樓下,佢問我可唔可以再攬一攬佢,
我攬住咗佢,佢問我可唔可以再錫佢一啖,
我亦同樣錫咗佢一啖......

當初大家都話當大家係代替品咁出黎開心一日......
佢,因為有男朋友等於無男朋友,
而我,就因為掛念住著一個唔會返黎自己身邊0既人......
或者一開始我唔應該應承或是要求佢咁做......
結果,同我所估一樣,佢鐘意咗我......
唉......點解個個都話鐘意我?
我有咩好?我花心,我一無是處,我大男人......
做朋友,我或者係會唔錯,
但做男朋友...連我自己都對自己無信心呢!

P.S.妳問我妳算唔算係我第十八個女朋友?
應該係第十九個了......
我會當妳係的!即使只係一日.....
我知妳係鐘意我的,
我亦知道妳會係一個好女朋友,
唔好為我呢d唔值得0既男人花時間,費眼淚......
我唔會忘記今日0既事,
亦唔會忘記,有一個咁傻0既女仔為我喊咗咁耐......
妳咬咗我一啖,要我永遠記住妳同今日,
我應該過妳我會,我就會!
請好好把握眼前的東西,
而我,根本唔係妳眼前的東西,我只係一片幻像......

我係一個百份之一百的傻瓜......
傻就傻在我明知無可能都要等,都要鐘意佢...
傻就傻在妳咁好,我亦唔肯同妳一齊......