當街流馬尿......

今日係星期六......
又喺度睇佢以前d日記...
睇返第一次同佢分手果陣,
佢期待同我一齊返,
而家諗返起,真係好心疼...
如果佢而家重係咁的話,你話幾好呢...

睇完之後,又走返上床度瞓,
發咗個夢,唔記得係咩夢了,
但記得見到阿蕾,至於做咗d咩,
唔記得了......
之後隔離屋鑽嘢,嘈醒咗我
淨開眼,d眼淚又係咁流出黎了......
唉......一點都無進步過......
之後起身,陪阿媽去食嘢,
話時話,阿媽今個星期三做埋另一隻眼0既手術啦...
食完之後,去咗睇衫,結果買咗件格仔Shirt衫,
哈,呢期好多人著呢!
之後就返屋企,D/L咗幾首好鐘意0既舊歌,
then又再睇佢d舊日記......
五點左右,換咗件格仔衫,
then就出街行......
無咩目的地的,只係想買個口琴
突然好想學吓玩口琴呢......
but上水無,then就走咗去坐火車...
又是無目的地,
不過到太和時,就落咗車
出閘之後,四圍行......
又做返以前d白痴嘢...四圍去搵人,
當然,亦係無目的地搵啦...
行返以前成日送阿蕾返屋企行果條路,
好希望可以遇見佢...
結果,當然係無啦!
之後,去咗吉之島,終於都比我買到口琴了...
then就行商場,實際上,係行一d佢有機會會行0既地方...
最後,行到去佢樓下...坐咗一陣,諗返起以前d嘢,
行去公園,記得自己點追佢...
又諗起第一次同佢接吻......
又記得上年31/12,
我送佢返屋企,then喺佢樓下公園,
我瞓喺佢大脾上面,要佢陪我等頭班巴士...
更加諗起我對佢0既承諾...
記得有一次,佢喺公園無啦啦喊,
叫我唔好玩佢,唔好掉低佢...
當時我應承佢,佢唔掉低我先,我唔會掉低佢...
結果,唉......點解我當日會忘記呢一個咁重要0既承諾呢!
坐喺果個位,為著自己背叛呢一個承諾,
我好內疚......終於,還是喊咗出黎......
同佢分手咁耐,第一次咁忍唔到喊,
竟然當街喊......
之後,行返出太和,又係諗住睇吓會唔會遇見佢,
記得以前,我唔識行原路返太和的,
但今日,出奇地識行...哈~~
出到太和....又想行返返去佢樓下,
因為想行果條路,
but我知我一行果條路,一定會喊到收唔到聲的...
果條路,就係我第一次拖佢,同佢一齊行果條路......
一年多前0既事了,行過呢條路,
好多感慨,喊出黎,我早就遇咗...
但估唔到,一年前0既晚上,我同佢講過d咩,
我竟然突然間好清楚地記返起晒......
記得佢叫我唔好衝紅燈,
記得佢話要同我慢慢發展,要打慢拍......
又記得,佢叫我唔好呃佢......
愈諗得起多,就喊得愈勁......
有人行過都收唔到聲果隻...
真係好少有呢!
之後,行到佢樓下,走到佢樓下間幼稚園,
見到張豬貼紙,記得每一次行過,
我都會喺呢個位拉停佢,
錫吓佢,又叫佢睇吓隻豬仔,
先會比佢走返上樓的......
唉......以前同佢一齊,實在太開心了......
根本,就無辦法忘記......
行到九點三左右,
阿媽吹我返屋企食飯,
突然覺得好唔捨得走,但始終係要走......
好想打比佢,話佢知我喺佢樓下,
好想求佢落黎見吓我...
但最後我都無咁做,因為我知佢已經好唔想聽到我把聲,
好唔想見到我......說穿了,根本就好憎我......
坐巴士返大埔,上火車,
坐到太和,我又落咗車......
喺度等,唔知自己等咩......
其實自己都明知佢唔會出現的...
但好想見到佢,因此就繼續等......
直到走咗五班車之後,第六班車到時我先肯上車走......
坐車時,望一望錶,都已經差唔多十點了...
見到今日已經11號......
重有3日又係14號了...而重有4日,就係佢生日......
我真係好想可以好似上年咁同佢一齊過佢0既生日...
唉......可惜無可能......

有冇人可以話我知,點先可以令佢再對我有信心,
再對我重新有返愛0既感覺呢......
要我付出d咩,我都肯的......
我知道每個剛失戀0既人都會好似我咁的,
只不過我係比較嚴重果隻.....
遲遲未能復原......
但我亦知道,我咁大個仔,所認識0既女仔入面,
最可以做到我老婆,對我最好0既女朋友之中,
佢係唯一一個......
我好多女仔朋友,但佢地亦唔係我認為好0既女朋友或結婚對象...
但佢,真係有呢d條件呢......
所以我愛佢......

P.S.最近,晚晚三四點都瞓唔著...
晚晚都拎阿爸d白蘭地黎飲......
睇黎遲d要買一支新0既返黎偷龍轉鳯了......
而且,睇黎我好快都要換肝了......
哈~~~