罪人......

今日,真係好唔開心呀......
即使尋日買咗部PocketPC都好,
今日真係好唔開心......

點解會咁架......
點解D人可以咁?

我因為鐘意第二個同阿蕾分手,比人話我衰,
我算!
我做咗Saman第三者,比人話我衰,
我算!
我走返轉頭想追返阿蕾,比人話我衰,
我都算!
咁......有咩我可以唔算?

點解我同佢講分手,會比人話我衰,
另一個佢同我講分手,我亦要比人話我衰?

我飛咗阿蕾,佢憎我
我比Saman飛,佢又憎我......

係因為我乞人憎?還是有人無理取鬧?

我飛阿蕾,佢同我講,我要負責任,
我比Saman飛,咁邊個又要負責任?
有邊個可以向我負責任?

我飛阿蕾,比人當正罪人,
係因為我鐘意第二個?
還是因為我飛咗佢?

我追Saman,又比人當正罪人,
係因為我做第三者?
還是因為我比佢飛咗呀?

點解咩嘢都係我?
有冇人可以出黎講吓道理?

打電話比阿蕾,第二個人聽,
竟然可以比人叫我過主!
ok......fine......

我諗我就黎會有精神病......
一直都無將心情講出黎......

都唔明點解,
今日咁好彩撞到Joyce,
好耐無見佢,同佢傾咗幾句近況,
我最後都忍唔住同佢講咗呢件事......
講真,同佢唔算熟,講黎都無用,
但,我真係唔明......我個傾訴對象竟然會係Joyce......

唉......算了......我早就比人當正千古罪人,
講咩,都無用......

從來只會有人記得秦始皇係暴君,
但又有幾多人會記念佢修建長城0既功績呢?

P.S.今日有預感,佢好快會比人搶走......
一諗到呢度,即使坐緊火車,我都忍唔住喊咗出黎......
不過,佢都已經唔再屬於我啦,又邊算係搶走呢......